العصبية دى حاجة ظريفة

لعصبية يا جماعة دي حاجة ظريفة جدا!!

العصبية يا جماعة دي حاجة ظريفة جدا!!

عارفين ازاي؟

اللي بيتنرفز بيحقق نتائج هايلة مع الناس اللي بيتنرفز عليهم..لو عايز حاجة بيلاقي الناس –غالبا– بينفذوا له اللي هو عايزه عشان يسكت..وهو ده اللي بيخلي العصبي مستحلي العملية دي!

جميل جدا..

لكن.. فكر معايا في الموقف ده..
لو واحد إنت متضايق منه..بتحاول تنرفزه..بتحاول تعصبه..بتحاول تخليه يغضب..صح؟
مع إن الشخص ده لو اتعصب ممكن يرميك بحاجة أو يؤذيك..!

بس إنت –رغم كده- عارف من جواك.. إنك لما بتعصبه..هو بيتضرر من جواه..أكتر من الضرر اللي ممكن يعمله لك!

هي دي الحقيقة يا جماعة...
الشخص العصبي هو نفسه بيتضرر أكتر من اللي محيطين بيه...
عارف إيه اللي ممكن يحصل له:-
1- الضغط العصبي المستمر ممكن يجيب له الضغط والسكر ومشاكل في القلب وكل الحاجات اللي احنا عارفينها دي..
2- بيخسر أهم علاقاته..بيخسر أقرب الناس ليه.. لمجرد إن هم أقرب الناس ليه لما بيتعصب!!
3- بيعيش حياة غير سعيدة..مليئة بالقلق والتوتر.. ماحدش بيحب يعيش كده طبعا!!..
4- العصبي لما بيتعصب بياخد قرارات خطأ.. في اللحظات دي العقل التحليلي بيكون في الباي باي.. مابتعرفش تاخد قرار منطقي صحيح وإنت متعصب.. فممكن تخسر كل حاجة...في لـــحظة!!
طــيب..إيه الحل بقى؟

عايز حل للعصبية؟؟

ببساطة..تعالوا ناخد الخطوات دي واحدة واحدة..
1-إدراك إن فيه مشكلة:


فيه ناس عصبيين جدا.. ومش حاسّين إن فيه مشكلة أساسا!!
حاسّين إن ده عادي جدا وإن مافيش مشكلة..
لازم الشخص العصبي يؤمن تماما إن فيه مشكلة وإنها لازم تتحل..
2-الرغبة في الحل:
فيه ناس عارفين إن فيه مشكلة وإنها لازم تتحل.. بس مش عايزين يحلوها!
لازم تكون عندك الرغبة الحقيقية في إنك تتغير..

3-التغيير يبدأ من داخلك:

أي تغيير لأي حاجة في حياتك.. نابع من داخلك إنت..
ماتقولش الظروف هي اللي بتخليني عصبي.. ماتقولش الناس هم اللي بيستفزوني..
قول: أنا اللي طريقتي في التعامل مع المشاكل: غلط!
التغيير يبدأ من داخلك إنت.. ماتطلبش من الناس إنهم يتغيروا عشان إنت تتغير.. لو إنت غيرت نفسك.. هتعرف تغير كل اللي حواليك!
4-غير نظرتك للأشياء:
مافيش أي حاجة تدعو للنرفزة..
اللي بيخليك تتنرفز هو: نظرتك لهذه الأشياء!


الخلاصة:إنك تدرب نفسك إنك تشوف اللي حواليك بصورة تخليك ماتشعرش بالضيق..
5-ركز في الهدف..
وإنت داخل في مود العصبية ركز في النتائج اللي إنت عايز تحققها..
يعني مثلا:
لو اتعصبت على واحد صاحبك.. ركز في الهدف بتاعك من الموقف ده:
-أناعايز أخسره؟
-أناعايز أذيه؟
-أناعايز يكرهني وينفر مني؟

اللي بيحصل إنك لما بتتعصب بتركز في المود اللي إنت فيه.. من غير ما تفكر في النتائج اللي إنت بتعمله..

لما تتعصب ركز في الحاجات اللي إنت مش عايز تخسرها في الموقف ده (أنا متضايق من اللي حصل صحيح.. بس مش عايز أخسر الشخص ده إلى الأبد!!!).
ساعتها هتهدأ.. أو على الأقل مش هتخسر اللي قدامك..

6-قواعد العصبية:


لو لقيت نفسك متعصب ودخلت المود خلاص.. خلي القواعد دي زي الحلق في ودانك:


- ماتغلطش في الكلام..
لما بتتعصب بتقول كلام مش لازم تقوله.. وبعد ما تهدأ هتندم عليه أشد الندم وهتقول: أنا قلت كده ازاي.. والله ما كنت أقصد!
لما الواحد بيتعصب على حد.. بيحاول يؤذيه على قد ما يقدر.. وممكن عشان كده يقول كلام هو مايقصدوش فعلا.. لكن قاله في الموقف ده عشان متعصب.. لكن للأسف.. المشاكل بتتنسي.. لكن الكلام اللي بيتقال عمره ما بيتنسي!
حاسب على كلامك.. اتعصب ماشي.. لكن اوعى تغلط


- ابعد!
لما تلاقي نفسك متعصب حاول تبعد عن مصدر الحاجة اللي بتعصبك.. هتعلي صوتك، التاني هيعلي صوته.. هتزعق.. التاني هيزعق..
حاول تقطع التسلسل ده.. ابعد وهدي نفسك وارجع تاني ناقش الكلام اللي كنت بتقوله..
ممكن تدخل غرفتك.. تسترخي تماما.. غمض عينيك.. اتنفس في بطء من مناخيرك وخرج الزفير من بقك.. ببطء جدا.. وخلي الزفير أطول من الشهيق..
ده اسمه التنفس الاسترخائي وحاول تفكر في حاجة لطيفة بتحبها.. تخيل إنك بتلاعب طفل صغير مثلا!


7-اعمل رابط!


لو إنت عصبي وعايز تحط حل فوري سريع للموضوع ده.. ممكن تبدأ بالخطوة دي: حط لنفسك رابط!!
..استخدم رابط يثير فيك الاسترخاء والهدوء واستخدمه وقت العصبية.. بس ماتعتمدش على النقطة دي بس عشان مش هتنفع طول الوقت..

هي دي خطوات التحكم في العصبية..

طيب.. فيه سؤال أكثر أهمية..

كيف تتعامل مع واحد متعصب؟؟
لو الشخص اللي بيتعصب ده هو قريبك أو شريك حياتك..
تتصرف ازاي؟